როდესაც ვსაუბრობთ, რომ ვიყოთ მზად, რათა 2024 წლისათვის ევროკავშირის წევრობაზე განაცხადი გავაკეთოთ, ეს იმას ნიშნავს, რომ ეკონომიკური კეთილდღეობის თვალსაზრისით აუცილებელი მინიმუმი კრიტიკულად მნიშვნელოვანია, - ამის შესახებ პრემიერ-მინისტრობის კანდიდატმა გიორგი გახარიამ პარლამენტის რიგგარეშე სხდომაზე განაცხადა.

მისი თქმით, იდეა მას შემდეგ ხდება აქტუალური, რაც საბაზისო პირობები იქნება დაკმაყოფილებული.

„ჩვენი ამოცანაა, დემოკრატიულად განვითარებული ქვეყანა ძლიერი დემოკრატიული ინსტიტუტებით. რაც მთავარია, ეკონომიკური კეთილდღეობის საკმარისი დონე მაინც, იმისთვის, რომ ევროპული სივრცისთვის საინტერესო გავხდეთ. თუ ეს საბაზისო პირობები არ დავაკმაყოფილეთ, ყველაფერი მეორეხარისხოვანი ხდება. არ უნდა გვქონდეს ილუზია, რომ ეკონომიკური განვითარების გარკეული დონის მიუღწევლად ვინმეს გაუხარდება ჩვენი ხილვა სადმე. ეს არის უაღრესად მნიშვნელოვანი“, - განაცხადა გიორგი გახარიამ.