რომის პაპმა ფრანცისკემ საშობაო მიმართვისას ყურადღება კორონავირუსის კრიზისის ფონზე ვაქცინის ხელმისაწვდომობის მნიშვნელობაზე გაამახვილა.

„ისტორიის ამ მომენტში, სადაც გვაქვს ეკოლოგიური კრიზისი და მძიმე სოციალ-ეკონომიკური დისბალანსი, რასაც აუარესებს კორონავირუსის პანდემია, კიდევ უფრო მნიშვნელოვანია, რომ ერთმანეთი მივიღოთ დებად და ძმებად. დღეს პანდემიის სიბნელისა და გაურკვევლობის პერიოდში, იმედის სხვადასხვა ნაპერწკალი ჩნდება, როგორიც არის ვაქცინების აღმოჩენა, მაგრამ იმისათვის, რომ ამ შუქმა გაანათოს და იმედი მოუტანოს მთელ კაცობრიობას, ისინი ყველასთვის ხელმისაწვდომი უნდა იყოს“, - განაცხადა რომის პაპმა.

პაპმა ფრანცისკემ საერთაშორისო საზოგადოებას და ქვეყნების ლიდერებს მოუწოდა, ვაქცინის ყველასთვის ხელმისაწვდომობა უზრუნველყონ, განსაკუთრებით კი მოწყვლად და გაჭირვებაში მყოფ მოსახლეობაზე იზრუნონ.

„მე ყველას ვთხოვ - სახელმწიფოთა მეთაურებს, კომპანიებსა და საერთაშორისო ორგანიზაციებს, ხელი შეუწყონ თანამშრომლობას და არა კონკურენციას, რათა იპოვონ გამოსავალი ყველასთვის, ვაქცინები ყველასთვის - განსაკუთრებით კი პლანეტის ყველა წერტილში ყველაზე მოწყვლადი და გაჭირვებული მოსახლეობისთვის. პირველ ადგილზე უნდა იყვნენ ყველაზე დაუცველი და გაჭირვებული ადამიანები“, - აღნიშნა რომის პაპმა.