რუსეთის სასჯელაღსრულების ფედერალური სამსახურის მოსკოვის ფილიალი რუს ოპოზიციონერ პოლიტიკოსს, ალექსეი ნავალნის აფრთხილებს, რომ თუ ის 29 დეკემბრის 9:00 საათზე მოსკოვის ფილიალში არ გამოცხადდება პირობითი პატიმრობა რეალური პატიმრობით შეეცვლება.

უწყება ჟურნალ The Lancet-ში გამოქვეყნებულ სტატიას ეყრდნობა, სადაც აღნიშნულია, რომ ალექსეი ნავალნი ბერლინის კლინიკიდან 2020 წლის 20 სექტემბერს გამოწერეს, 12 ოქტომბრისთვის კი მას ავადმყოფობის არანაირი სიმპტომი აღარ აღენიშნებოდა.

„შესაბამისად, პირობითად მსჯავრდებული არ ასრულებს მასზე სასამართლოს მიერ დაკისრებულ მოვალეობას და თავს არიდებს სისხლის სამართლის აღსრულების ინსპექციის კონტროლს“, - აცხადებენ რუსეთის სასჯელაღსრულების ფედერალური სამსახურში.

ცნობისათვის, მოსკოვის სასამართლომ 2014 წელს ალექსეი ნავალნი კომპანია „ივ როშეს“ სახსრების მიტაცებაში დამნაშავედ ცნო და3.5 წლით პირობითი სასჯელი და 5-წლიანი გამოსაცდელი ვადა მიუსაჯა, რომელიც მოგვიანებით ერთი წლით გაუხანგრძლივდა და შესაბამისად, მიმდინარე წლის 30 დეკემბერს იწურება.