რუსეთის პრეზიდენტმა ვლადიმერ პუტინმა ხელი მოაწერა კანონს, რომელიც მასობრივი კომუნიკაციის და საინფორმაციო ტექნოლოგიების ზედამხედველობის სამსახურს, “როსკომნადზორს”, უფლებამოსილებას ანიჭებს, დაბლოკოს ის ინტერნეტ რესურსები, რომლებსაც რუსული მედიის მიმართ „დისკრიმინაციული დამოკიდებულება“ აქვთ.

რუსული მედიის ინფორმაციით, კანონი აწესებს სტატუსს: „საინფორმაციო რესურსის მფლობელი, რომელიც მონაწილეობს ადამიანის ფუნდამენტური უფლებებისა და თავისუფლებების, რუსეთის ფედერაციის მოქალაქეთა უფლებებისა და თავისუფლებების დარღვევაში“. გენერალურ პროკურორსა და მის მოადგილეებს, რუსეთის საგარეო საქმეთა სამინისტროსთან შეთანხმებით, უფლება ექნებათ ეს სტატუსი საინფორმაციო რესურსის იმ მფლობელს მიანიჭონ, რომელიც რუსული მედიასაშუალებების მასალების დისკრიმინაციას ახდენს.

„როსკომნადზორს“ შეეძლება ნაწილობრივ ან სრულად შეუზღუდოს დამრღვევ რესურსებზე წვდომა.

დოკუმენტი მოიცავს ისეთ ინტერნეტ რესურსებსაც, როგორიცაა YouTube, Facebook-ი და Twitter-ი.

დოკუმენტი სახელმწიფო სათათბიროში დეპუტატთა ჯგუფმა და სენატორმა ალექსეი პუშკოვმა 19 ნოემბერს შეიტანეს.