ხათუნა გოგორიშვილი - ბიძინა ივანიშვილმა თავმჯდომარეობა გადააბარა ყველაზე მორჩილს, ვინც ყველაზე "კარგად" იქცეოდა

ივანიშვილის მთავარი მიზანია, რომ ყველას ერთმანეთი უნდა სძულდეს და მისი ამ მიზნის ყველაზე კარგი განმახორციელებელი არის ირაკლი კობახიძე, რომელიც ყოველთვის მოახერხებს ისე მოიქცეს, რომ სრულიად წყნარ ადგილას დაპირისპირება გამოიწვიოს , - ასე შეაფასა „ევროპული საქართველოს“ ერთ-ერთმა ლიდერმა ხათუნა გოგორიშვილმა „ქართული ოცნების“ პოლიტიკური საბჭოს გადაწყვეტილება, რომ პარტიის თავმჯდომარის პოსტზე ირაკლი კობახიძის კანდიდატურა წარედგინა.

როგორც ხათუნა გოგორიშვილმა „პალიტრანიუსის“ გადაცემა „დღის თემაში“ განმარტა, ბიძინა ივანიშვილის გადმოსახედიდან ირაკლი კობახიძე არის ის პოლიტიკოსი, რომელიც მის მიერ დაწყებული გახლეჩისა და დაპირისპირების პოლიტიკას გააგრძელებს.

„ყველაზე მორჩილს, ყველაზე კრიტიკულ სიტუაციაში, მისი გადასახედიდან, ყველაზე კარგად რომ იქცეოდა, იმ ადამიანს გადააბარა თავმჯდომარეობა. პარლამენტში ბევრი შემთხვევა ყოფილა, როდესაც სრულიად უადგილო ადგილას, როდესაც აბსოლუტურად არანაირი დაპირისპირება და არანაირი კონფლიქტის აუცილებლობა და არაფერი მსგავსი არ იყო, ირაკლი კობახიძე გამოირჩეოდა ამ განსაკუთრებული ოდიოზური აგრესიით და როდესაც ამას ვუყურებდი, ვფიქრობდი, რომ ეს არის ბიძინას დასანახად გაკეთებული. მე ვერ წარმომიდგენია, რომ ნორმალურმა ადამიანმა შეიძლება ისეთი ფრაზები თქვას, რასაც ის ამბობდა და ისე მოიქცეს, როგორც ის იქცეოდა.

ბიძინა ივანიშვილი 2012 წლიდან მოყოლებული დაკავებულია მხოლოდ და მხოლოდ იმით, რომ გახლიჩოს და პოლარიზება გაუკეთოს საქართველოს და საზოგადოებას. ბიძინას გადასახედიდან, ყველაზე კარგად ამ დაპირისპირებასა და გახლეჩას გააგრძელებს ირაკლი კობახიძე. ის არ არის დარწმუნებული, იმიტომ, რომ გახარია შეიძლება უცებ გამოვიდეს და თქვას: „ „დავიწყეთ ბოდიშით!“ შეიძლება გამოვიდეს კახი კალაძე და ვიღაცაზე რაღაც დადებითი თქვას, რომ პროფესიონალია, კობახიძე არასდროს ამას არ გააკეთებს და იმიტომ - კობახიძე. რაც მთავარია, ეს ივანიშვილის ფიქრები კი არ არის, ფაქტებით არის დადასტურებული, რომ კობახიძე გააგრძელებს ამ გახლეჩისა და დაპირისპირების პოზიციას და პოლიტიკას, რომელიც ივანიშვილს მთელი ამ წლების განმავლობაში ჰქონდა“, - განაცხადა ხათუნა გოგორიშვილმა.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს