თურქეთში კორონავირუსის საწინააღმდეგო ვაქცინაცია ორ დღეში 500 000-ზე მეტ ადამიანს ჩაუტარდა, -ამის შესახებ ინფორმაციას The Guardian-ი თურქეთის ჯანდაცვის სამინისტროს მონაცემებზე დაყრდნობით ავრცელებს.

ანკარამ ჩინური კომპანია Sinovac-ის მიერ წარმოებული კორონავირუსის საწინააღმდეგო ვაქცინით, CoronaVac-ით, მოსახლეობის ვაქცინაციის პროგრამა გუშინ დაიწყო.

თურქეთის ჯანდაცვის სამინისტროს ინფორმაციით, პირველ დღეს 285 000-ზე მეტი, საერთო ჯამში კი - 523 338 ადამიანი აიცრა.

”ვაქცინაციის პროგრამების ქვეყნის მასშტაბით განხორციელების კუთხით ჩვენ გამოცდილი ქვეყანა ვართ და ასეთი პროგრამების ორგანიზებისთვის საჭირო ინფრასტრუქტურაც გვაქვს. პანდემიაზე ერთად გავიმარჯვებთ“, - განაცხადა თურქეთის ჯანდაცვის მინისტრმა ფაჰრეთინ კოჩამ.

თურქეთში, რომლის მოსახლეობა 82 მილიონს შეადგენს, კორონავირუსის 2.3 მილიონზე მეტი შემთხვევაა დადასტურებული, აქედან ვირუსს 23 000-მდე ადამიანის სიცოცხლე ემსხვერპლა.