მოვისმინე სხვა პოლიტიკური პარტიების ძალიან ხისტი განცხადებებიც, რომ უნდა მოიკვეთონ და ა.შ. ვფიქრობ, რომ მოკვეთის, განკვეთის და ლუსტრაციის მომენტიც ძალიან მარტივად დგება იმ მომენტში, როდესაც ესა თუ ის პოლიტიკოსი პარლამენტში შედის, პარლამენტში, რომელიც არის მონოპარტიული, კომუნისტური და ივანიშვილის მიერ მოპარული არჩევნების შედეგად ფორმირებული, - ამის შესახებ „ნაციონალური მოძრაობის“ წევრმა თინა ბოკუჩავამ „პალიტრანიუსის“ გადაცემაში „360 გრადუსი“ განაცხადა.
ბოკუჩავა ფიქრობს, რომ მანამდე ყველას უნდა დარჩეს ის „შანსი, რომ პოზიტიური იმპულსი მომავალში მაინც შეიტანოს საერთო ოპოზიციურ ფორმატში“.
„თუ მათ ეს სურვილი არ აქვს, მაშინ წულუკიანის სიტყვები, რო გავიხსენო, განიხურონ ოპოზიციის მანტია და შევიდნენ პარლამენტში და საზოგადოება ყველაფერს დაარქმევს სახელს“, - განაცხადა ბოკუჩავამ.
მან ასევე უპასუხა დასმულ შეკითხვას „გირჩისა“ და ნიკა მელიას შეხვედრის პერსპექტივაზე.
„რა თქმა უნდა, ჩვენ ყოველთვის ვაცხადებთ, რომ ღია ვართ და ვიქნებით ყველა ტიპის შეხვედრის მიმართ, უბრალოდ, ახლა, მართლაც ძალიან დაიძაბა სიტუაცია. ვფიქრობ, რომ თვითონ არც ალეკო ელისაშვილის პარტიამ და არც „გირჩის“ იმ ნაწილმა, რომელსაც ვახო მეგრელიშვილი და იაგო ხვიჩია წარმოადგენენ, შეუწყვეს ხელი იმას, რომ სიტუაცია განმუხტულიყო და ისევ ჩამდგარიყო ნორმალურ კალაპოტში. თუმცა, მე ვფიქრობ და აქამდე ეს პოზიცია ჰქონდა ნიკა მელიას, რომ ჩვენ მაინც ღია უნდა დავრჩეთ იმისათვის, რომ ერთობა უნდა იყოს შენარჩუნებული“, - განაცხადა ბოკუჩავამ.