ირანმა რუსული ვაქცინა Sputnik V-ი დაამტკიცა და მის როგორც იმპორტს, ასევე წარმოებას გეგმავს, - ამის შესახებ ირანის საგარეო საქმეთა მინისტრმა მუჰამედ ჯავად ზარიფმა რუს კოლეგა სერგეი ლავროვთან შეხვედრაზე განაცხადა.
„ჩვენმა ჯანდაცვის ორგანოებმა Sputnik V-ი დაარეგისტრირეს და დაამტკიცეს. იმედი გვაქვს, უახლოეს მომავალში შევძლებთ როგორც მის შეძენას, ასევე წარმოებას“, - განაცხადა ზარიფმა.
შეგახსენებთ, რამდენიმე კვირის წინ ირანის უზენაესმა ლიდერმა აიათოლა ალი ხამენეიმ ქვეყნის მთავრობას შეერთებული შტატებისა და გაერთიანებული სამეფოდან ვაქცინების იმპორტი აუკრძალა.
ცნობისათვის, ირანში, რომლის მოსახლეობა 83 მილიონს შეადგენს, პანდემიის გავრცელების დროიდან კორონავირუსის 1.38 მილიონი შემთხვევაა დადასტურებული, ქვეყანაში ვირუსს დღემდე 57 000-ზე მეტი ადამიანის სიცოცხლე ემსხვერპლა.