რუსეთის პრეზიდენტმა ვლადიმერ პუტინმა ხელი მოაწერა კანონს აშშ-სთან გაფორმებული სტრატეგიული შეიარაღების შემცირების შესახებ ხელშეკრულების (New START) 2026 წლის 5 თებერვლამდე გაგრძელების შესახებ, - ამის შესახებ ინფორმაციას რუსული მედია კრემლის პრესსამსახურზე დაყრდნობით ავრცელებს.
”ფედერალური კანონი რუსეთის ფედერაციასა და შეერთებულ შტატებს სტრატეგიული შეიარაღების შემცირების შესახებ გაფორმებული ხელშეკრულების გაგრძელების შეთანხმების რატიფიცირებას ახდენს, რომელსაც რუსეთმა და აშშ-მ 2021 წლის 26 იანვარს მიაღწიეს,“ - ნათქვამია განცხადებაში.
კრემლის პრესსამსახურის ცნობით, ფედერალური კანონი მისი ოფიციალურად გამოქვეყნების დღიდან ამოქმედდება.
რამდენიმე დღის წინ ცნობილი გახდა, რომ ამერიკის შეერთებული შტატები და რუსეთი 2010 წელს გაფორმებული სტრატეგიული შეიარაღების შეზღუდვის შესახებ ხელშეკრულების გაგრძელებაზე შეთანხმდნენ, რომლის ვადა მიმდინარე წლის 5 თებერვალს იწურება.