ირანში ევროპიდან ჩასულ მგზავრებს 2-კვირიანი სავალდებულო კარანტინის გავლა მოუწევთ, - Reuters-ის ინფორმაციით, ამის შესახებ ირანის კორონავირუსთან ბრძოლის ეროვნული კომიტეტის პრესსპიკერმა ალირეზა რაისმა განაცხადა.
მისივე თქმით, სხვა რეგიონებიდან, მათ შორის მეზობელი ქვეყნებიდან, შესვლის მსურველმა მოქალაქეებმა კორონავირუსზე ჩატარებული ტესტის ნეგატიური პასუხი უნდა წარადგინონ.
რაისმა განმარტა, რომ უარყოფითი პასუხის წარდგენა ევროპიდან ჩასული მგზავრებისთვისაც სავალდებულოა, თუმცა მათ, ირანში ჩასვლისას ტესტი ხელახლა უნდა გაიარონ და უარყოფითი პასუხის შემთხვევაში 2-კვირიანი თვითიზოლაცია მაინც უნდა გაიარონ.
ალირეზა რაისს არ დაუკონკრეტებია, როდის ამოქმედდება ახალი ზომები და მხოლოდ სიტყვა „ამიერიდან“ ახსენა.
აღსანიშნავია, რომ აქამდე ირანში ევროპიდან ჩასულ მგზავრებს მხოლოდ ტესტის უარყოფითი შედეგის დამადასტურებელი დოკუმენტის წარდგენა მოეთხოვებოდათ.
ირანში, პანდემიის დაწყების დროიდან, კორონავირუსის 1.4 მილიონი შემთხვევაა დადასტურებული, აქედან ვირუსს 57 800-ზე მეტი ადამიანის სიცოცხლე ემსხვერპლა.