კომპანია AstraZeneca ევროკავშირს, მიმდინარე წლის პირველ კვარტალში, კორონავირუსის საწინააღმდეგო ვაქცინის 9 მილიონ დამატებით დოზას მიაწვდის, - ამის შესახებ ევროკომისიის პრეზიდენტმა ურსულა ფონ დერ ლეიანმა განაცხადა.

“ AstraZeneca, პირველ კვარტალში, 9 მილიონ დამატებით დოზას (საერთო ჯამში 40 მილიონ დოზას) მოგვაწვდის,“- წერს ევროკომისიის პრეზიდენტი სოციალურ ქსელ „ტვიტერში“.

მისი შეფასებით, აღნიშნული ფაქტი ვაქცინებთან დაკავშირებით „წინგადადგმული“ ნაბიჯია.

ცნობისათვის, AstraZeneca-სა და ევროკავშირს შორის თავდაპირველად მიღწეული შეთანხმების თანახმად, კომპანიას ბლოკისთვის, 2021 წლის პირველ ნახევარში, ვაქცინის 80 მილიონი დოზა უნდა მიეწოდებინა. კომპანიამ რამდენიმე დღის წინ განაცხადა, რომ ჰოლანდიასა და ბელგიაში მდებარე საწარმოებში წარმოებასთან დაკავშირებით შექმნილი პრობლემების გამო, წლის პირველ კვარტალში ვაქცინის დაპირებული რაოდენობით მიწოდებას ვერ შეძლებდა. ამ განცხადების გამო ევროკავშირმა კომპანია გააკრიტიკა და განაცხადა, რომ ეს კონტრაქტის პირობების დარღვევა იყო, რის გამოც, საჭიროების შემთხვევაში, სამართლებრივ ზომებს მიიღებდა.