ჩინეთის კომუნისტური პარტიის ცენტრალური საგარეო საქმეთა კომისიის დირექტორმა იან ცზიჩიმ პეკინსა და ვაშინგტონს ურთიერთობების „პროგნოზირებად და კონსტრუქციულ გზაზე“ დაყენებისკენ მოუწოდა და განაცხადა, რომ შეერთებულმა შტატებმა ჩინეთის საშინაო საქმეებში ჩარევა უნდა შეწყვიტოს.

„შეერთებულმა შტატებმა ჩინეთის საშინაო საქმეებში ჩარევა უნდა შეწყვიტოს, მათ შორის ჰონგ-კონგის, ტიბეტის და სინძიანის საკითხებთან დაკავშირებით,“- აღნიშნა ჩინელმა დიპლომატმა პეკინში აშშ-ჩინეთის ურთიერთობების კომიტეტის მიერ ორგანიზებულ ონლაინ ფორუმზე.

მისი თქმით, ჩინეთი შეერთებული შტატების საშინაო საქმეებში, მათ შორის არჩევნებში, არასდროს ჩარეულა.

“იმედი გვაქვს, შეერთებული შტატები მეტოქეობის მოძველებულ მენტალიტეტზე მაღლა დადგება და ურთიერთობის სწორი გზის შენარჩუნების მიზნით ჩინეთთან ითანამშრომლებს,“- აღნიშნა იან ცზიჩიმ.

მისი თქმით, ჩინეთი მზადაა ითანამშრომლოს შეერთებულ შტატებთან ურთიერთობების გაუმჯობესების მიზნით "ურთიერთპატივისცემის საფუძველზე, კონფლიქტისა და დაპირისპირების გარეშე.“