განცხადება, რომ შევძლებთ ვაქცინაცია მესამე კვარტლის ბოლომდე თითოეულ მოქალაქეს შევთავაზოთ, ძალაში დარჩება, - ამის შესახებ გერმანიის კანცლერმა ანგელა მერკელმა განაცხადა.

მისივე თქმით, ვაქცინების მიწოდებაში შეფერხების მიუხედავად დაპირების შესრულება შესაძლებელია, ვინაიდან გერმანიის მთავრობამ ვაქცინების მარაგთან დაკავშირებით გარანტიები მიიღო, რაც შესაძლებელს გახდის, ვაქცინაციის შეთავაზება ზაფხულის ბოლომდე ყველა მოქალაქემ მიიღოს.

მერკელის თქმით, გერმანიაში ვაქცინაციის სხვა ქვეყნებთან შედარებით დაბალი ტემპის რამდენიმე მიზეზი არსებობს, მათ შორის, აშშ-სთან შედარებით წარმოების ნაკლები მოცულობა და ის ფაქტი, რომ ბლოკს სურდა ვაქცინების რეგულარული და არა გადაუდებელი გამოყენების მიზნით დამტკიცება. „ბოლოს და ბოლოს, ეს ნდობის საკითხიცაა,“ - აღნიშნა გერმანიის კანცლერმა.

შეგახსენებთ, გუშინ ანგელა მერკელმა გერმანიის 16-ვე რეგიონის ხელმძღვანელებთან შეხვედრა გამართა, სადაც ქვეყნის ვაქცინაციის პროგრამის გაუმჯობესებაზე იმსჯელეს.

იხილეთ ვიდეო:ანგელა მერკელი - განცხადება, რომ მესამე კვარტლის ბოლოსთვის ვაქცინაციას ყველა მოქალაქეს შევთავაზებთ, ძალაში დარჩება