მოსკოვის საქალაქო სასამართლოსთან, სადაც დღეს ოპოზიციონერი პოლიტიკოსის, ალექსეი ნავალნის პირობითი სასჯელის პატიმრობით შეცვლის საკითხზე უნდა იმსჯელონ, რუსეთის უსაფრთხოების ზომები გაამკაცრეს.

რუსული მედიის ინფორმაციით, მეტროსადგურ „პრეობრაჟენსკაიას მოედანთან“ სამართალდამცავების ავტომობილები არიან მობილიზებული. ამასთან, „ომონის“ თანამშრომლებმა სასამართლომდე მისასვლელი გზა გადაკეტეს, სადაც მხოლოდ სასამართლოს თანამშრომლებსა და სასამართლოს შენობასთან ახლოს მცხოვრებ მოქალაქეებს უშვებენ.

მოსკოვის საქალაქო სასამართლოში ფედერალური სასჯელაღსრულების სამსახურის ბრალდებები უნდა განიხილონ, რომლის თანახმადაც ალექსეი ნავალნიმ გაფლანგვის საქმეზე 2014 წელს მისჯილი პირობითი სასჯელი დაარღვია.

შეგახსენებთ, 2014 წლის დეკემბერში ალექსეი ნავალნი მოსკოვის სასამართლომ 30 მილიონი რუსული რუბლის გაფლანგვასთან დაკავშირებული „ივ-როშესა“ და 16 მილიონი რუბლის გაფლანგვასთან დაკავშირებული „კიროვლეს“ საქმეებზე დამნაშავედ ცნო და პირობითი სასჯელი მიუსაჯა. 2017 წლის აგვისტოში კი გამოსაცდელი ვადა 2020 წლის 29 დეკემბრამდე გაუგრძელეს. „ნოვიჩოკის“ ნერვული აგენტით მოწამვლის გამო ბერლინის საავადმყოფოში გადაყვანილი ნავალნი 17 იანვარს, რამდენიმე თვიანი მკურნალობის შემდეგ, რუსეთში დაბრუნდა. ის მოსკოვის აეროპორტშივე დააკავეს და 30-დღიანი წინასწარი პატიმრობა მიუსაჯეს.