თურქეთში სკოლების გახსნამდე მასწავლებლებს კორონავირუსის საწინააღმდეგო ვაქცინაციას ჩაუტარებენ, - Reuters-ის ინფორმაციით, ამის შესახებ თურქეთის განათლების მინისტრმა ზია სელჩუკმა დღეს სატელევიზიო მიმართვის დროს განაცხადა.

მისი თქმით, ქვეყანაში სკოლამდელი აღზრდის დაწესებულებები 15 თებერვალს გაიხსნება, სკოლის მოსწავლეები კი გაკვეთილებზე დასწრებას 1-ელი მარტიდან შეძლებენ.

„ვგეგმავთ, პედაგოგები, რომლებიც პირისპირ სწავლებაში ჩაერთვებიან, მიმდინარე თვის განმავლობაში ავცრათ,“- განაცხადა მინისტრმა.

მისი განმარტებით, დაწყებითი კლასების მოსწავლეები გაკვეთილებს კვირაში ორჯერ დაესწრებიან, ხოლო მე –8 და მე –12 კლასების მოსწავლეები, რომლებიც საშუალო სკოლისა და უნივერსიტეტის გამოცდებისთვის ემზადებიან, ყოველდღე.

თურქეთში, ამ დროისთვის, კორონავირუსის თითქმის 2.5 მილიონი შემთხვევაა დაფიქსირებული, აქედან დაღუპულია 26000-ზე მეტი ადამიანი.

ჯანდაცვის სამინისტროს მონაცემებით, დღემდე ქვეყანაში ჩინური კომპანია Sinovac Biotech– ის კოვიდ 19-ის საწინააღმდეგო ვაქცინით 2.2 მილიონი მოქალაქეა აცრილი.