გერმანია, საფრანგეთი და გაერთიანებული სამეფო კრემლის კრიტიკოსის ალექსეი ნავალნის წინააღმდეგ გამოტანილ განაჩენს გმობენ და მოსკოვს მისი დაუყოვნებლივ გათავისუფლებისკენ მოუწოდებენ.

„ალექსეი ნავალნის წინააღმდეგ გამოტანილი განაჩენი შორს არის კანონის უზენაესობის სტანდარტებისგან. ნავალნი დაუყოვნებლივ უნდა გაათავისუფლონ. მშვიდობიანი დემონსტრანტების მიმართ ძალადობა უნდა შეწყდეს”, - წერს ანგელა მერკელის პრესსპიკერი სოციალურ ქსელ „ტვიტერში“.

გაერთიანებული სამეფოს პრემიერ-მინისტრმა ბორის ჯონსონმა მოსკოვის საქალაქო სასამართლოს გადაწყვეტილება „ნამდვილ სიმხდალედ" შეაფასა და განაცხადა, რომ ნავალნი დაუყოვნებლივ უნდა გათავისუფლდეს.

ნავალნისთვის პირობითი სასჯელის რეალური პატიმრობით შეცვლის ფაქტს გაერთიანებული სამეფოს საგარეო უწყების ხელმძღვანელი, დომინიკ რააბიც გამოეხმაურა და აღნიშნა, რომ გაერთიანებული სამეფო ალექსეი ნავალნის და რუსეთში ბოლო ორი კვირის განმავლობაში დაკავებული ჟურნალისტებისა და მშვიდობიანი მომიტინგეების დაუყოვნებლივ და უპირობო გათავისუფლებას მოითხოვს.

„სასამარლოს გადაწყვეტილება აჩვენებს, რომ რუსეთი ვერ ასრულებს ყველაზე მნიშვნელოვან ვალდებულებებს, რომლის შესრულებაც საერთაშორისო საზოგადოების პასუხისმგებელი წევრისგან არის მოსალოდნელი,” - განაცხადა დომინიკ რააბმა.

ალექსეი ნავალნის დაუყოვნებლივ გათავისუფლებისკენ რუსეთს საფრანგეთის პრეზიდენტმა ემანუელ მაკრონმაც მოუწოდა.

”ალექსეი ნავალნის დაგმობა მიუღებელია. პოლიტიკური უთანხმოება არასოდეს არის დანაშაული. ჩვენ ვითხოვთ მის დაუყოვნებლივ გათავისუფლებას ”, - წერს მაკრონი განცხადებაში, რომელიც „ტვიტერშია“ გამოქვეყნებული.

მოსკოვის საქალაქო სასამართლომ ალექსეი ნავალნის „ივ- როშეს“ საქმესთან დაკავშირებით პირობითი სასჯელი რეალურით შეუცვალა და 3 წლითა და 6 თვით თავისუფლების აღკვეთა მიუსაჯა. თუმცა, ადვოკატების განმარტებით, იმის გამო, რომ მან შინაპატიმრობაში გარკვეული დრო გაატარა, ნავალნის ციხეში, რეალურად, 2 წლისა და 8 თვის გატარება მოუწევს. ადვოკატები აცხადებენ, რომ ისინი განაჩენის გასაჩივრებას გეგმავენ.