ინდოეთში, ჰიმალაის მყინვარიდან წყლის მოვარდნის შედეგად 150-მდე ადამიანი დაკარგულად ითვლება. სტიქიის გამო მიმდებარე სოფლების ევაკუაცია განხორციელდა.

როგორც „როიტერს“ უტარაკჰანდის შტატის ადგილობრივი ხელისუფლების წარმომადგენელმა განუცხადა, დაღუპულთა შესახებ ზუსტი რიცხვი ჯერ დადასტურებული არ არის, თუმცა შიშობენ, რომ დაახლოებით 100-150 ადამიანია გარდაცვლილი.

თვითმხილველების თქმით, წყალმა მდინარის კალაპოტში შლამი და ქვებიც ჩაიტანა და გზად კაშხალი და ყველაფერი წალეკა.

ადგილობრივები შიშობენ, რომ ნაკადმა ახლოს მდებარე ჰდროელექტრო სადგურზე მომუშავე ადამიანები, ასევე სოფლის ის მაცხოვრებლები წაიღო, რომლებსაც მდინარის მახლობლად პირუტყვი გადაჰყავდათ ან შეშას აგროვებდნენ. მეზობელ უტარ-პრადეშის შტატშიც მდინარისპირა დასახლებებში მზადყოფნა გამოცხადდა.

მომხდარს გამოეხმაურა ქვეყნის პრემიერ-მინისტრი ნარენდრა მოდი, რომელმაც აღნიშნა, რომ ყურადღებით აკვირდება სიტუაციას. ინდოეთის საჰაერო ძალები მზადყოფნაში მოვიდა სამაშველო ოპერაციების განსახორციელებლად, ასევე სამძებრო ოპერაციებში ჩასართავად ადგილზე გადაჰყავთ კატასტროფებთან რეაგირების ჯგუფები.