მიანმარში სამხედრო გადატრიალების წინააღმდეგ მიმდინარე საპროტესტო აქციების დასაშლელად პოლიციამ წყლის ჭავლი გამოიყენა.
Reuters-ის ინფორმაციით, პოლიციამ წყლის ჭავლი მიანმარის დედაქალაქ ნაიფიიდოში გამოიყენა, სადაც ათასობით ადამიანი შეიკრიბა. ჯერჯერობით, არ ვრცელდება ინფორმაცია, არიან თუ არა დაშავებულები.
გავრცელებული ინფორმაციით, ქალაქ იანგონში სტუდენტებისა და სხვადასხვა დაწესებულების მუშების აქციებს ბერები და ექთნებიც შეუერთდნენ.
ათასობით ადამიანმა მოაწყო საპროტესტო მსვლელობა ზღვისპირა ქალაქ დავეისა და კაჩინის შტატის დედაქალაქშიც, სადაც მიმიტინგეები შავ სამოსში იყვნენ გამოწყობილები.
მიანმარში სამხედრო გადატრიალება რამდენიმე დღის წინ მოხდა. არმიამ, რომელიც გასული წლის ნოემბერში ჩატარებული არჩევნების შედეგებს არ აღიარებს, ქვეყნის არჩეული ლიდერი აუ სან სუ ჩი და ასობით კანონმდებელი დააკავა და ერთწლიანი საგანგებო მდგომარეობა გამოაცხადა.
იხილეთ ვიდეო:მიანმარის პოლიციამ მომიტინგეების დასაშლელად წყლის ჭავლი გამოიყენა