ჩრდილოეთ კორეამ ბირთვული და ბალისტიკური რაკეტები 2020 წლის განმავლობაშიც განავითარა, რაც საერთაშორისო სანქციების დარღვევაა, - ამის შესახებ გაერო-ს ანგარიშშია აღნიშნული, რომელიც დამოუკიდებელი ექსპერტების მიერ არის მომზადებული და რომლის შინაარსი რამდენიმე მედია საშუალებისთვის გახდა ცნობილი.
დოკუმენტის თანახმად, ჩრდილოეთ კორეამ პროგრამები კიბერშეტევის შედეგად მოპარული 300 მილიონი აშშ დოლარით დააფინანსა.
მოხსენებაში ასევე აღნიშნულია, რომ ჩრდილოეთ კორეამ სამხედრო აღლუმებზე წარადგინა ახალი მოკლე და საშუალო რადიუსის, წყალქვეშა და კონტინენტური ბალისტიკური რაკეტის სისტემები.
“მან (ჩრდილოეთ კორეამ) განაცხადა, რომ ემზადება ახალი ბალისტიკური რაკეტის ქობინების გამოსაცდელად და წარმოებისთვის, ასევე ტაქტიკური ბირთვული იარაღის განვითარებისათვის და განაახლა ბალისტიკური სარაკეტო სისტემის ინფრასტრუქტურა”, - ნათქვამია მოხსენებაში.
დოკუმენტის თანახმად, გასულ წელს, ჩრდილოეთ კორეამ და ირანმა შორი რადიუსის მოქმედების რაკეტების პროექტების განვითარებაზე თანამშრომლობა განაახლეს.