„ახალგაზრდობის სააგენტოს“ საქმიანობამ, ინსპირაცია მისცა აღმოსავლეთ პარტნიორობის სხვა ქვეყნებსაც, - ამის შესახებ ევროკომისიის სამეზობლოსა და გაფართოების საკითხებზე მოლაპარაკებების გენერალური დირექტორატის (DG NEAR) საქართველოსა და მოლდოვის განყოფილების ხელმძღვანელმა მეთიუ ბუსკე, ევროკავშირის Skills4Jobs პროგრამის ფარგლებში გამართულ მეოთხე საკოორდინაციო შეხვედრაზე, განაცხადა.

როგორც „ინტერპრესნიუსს“ „ახალგაზრდობის სააგენტოდან“ აცნობეს, მეთიუ ბუსკე სააგენტოს მუშაობას დადებითად აფასებს.

„გვიხარია, რომ ახალგაზრდობის სააგენტო წარმატებით საქმიანობს ბოლო წლების განმავლობაში. ჩვენ ვაკვირდებით მათ მუშაობას, განსაკუთრებით ახალგაზრდული სტრატეგიის შემუშავების პროცესს, როგორც თბილისიდან ისე ბრიუსელიდან. „ახალგაზრდობის სააგენტოს“ საქმიანობამ, ინსპირაცია მისცა აღმოსავლეთ პარტნიორობის სხვა ქვეყნებსაც“, - განაცხადა მეთიუ ბუსკემ.

მათივე ცნობით, შეხვედრას „ახალგაზრდობის სააგენტოს“ ხელმძღვანელი რეზო ჩარკვიანი ესწრებოდა, რომელმაც თავის მხრივ, სააგენტოს რეფორმებზე და 8 ძირეული მიმართულების შუალედურ შედეგებზე ისაუბრა ახალგაზრდული სფეროს ეკოსისტემის შექმნის პროცესში.