რუსეთის საგარეო საქმეთა სამინისტროს ოფიციალური წარმომადგენელი მარია ზახაროვა არ ეთანხმება შეფასებას, რომ ოპოზიციონერი პოლიტიკოსი ალექსეი ნავალნი სინდისის პატიმარია და აცხადებს, რომ ნავალნის „სინდისი არ აქვს“.

„მინდა ვთქვა, რომ უცხოური მედია მხარს უჭერდა, ან ჩართული იყო ამ კამპანიაში. ასევე არასამთავრობო ორგანიზაციები: Amnesty International -ი, რომელმაც ნავალნის სინდისის პატიმარი უწოდა. ეს უბრალოდ ოქსიმორონია - შეუძლებელია სინდისის პატიმარი უწოდო ადამიანს, რომელსაც სინდისი არ გააჩნია, რადგან ის ცრუობს“, - განაცხადა ზახაროვამ რუსეთის შიდა საქმეებში უცხო ქვეყნების ჩარევის საკითხთა შემსწავლელი დუმის კომისიის სხდომაზე გამოსვლისას.

მისივე შეფასებით, ჩართული ქვეყნების მხრიდან საინფორმაციო რესურსების გამოყენება ქვეყნის შიდა საქმეებში ჩარევის მიზნით სხვაგვარად ვერ შეფასდება რუსეთის მხრიდან, თუ არა საერთაშორისო სამართლებრივ პრინციპებთან შეუთავსებლობა.