ევროპის ცენტრალური ბანკის ყოფილი ხელმძღვანელი მარიო დრაგი ოფიციალურად დაინიშნა იტალიის პრემიერ-მინისტრად. დრაგის ადმინისტრაცია მოვალეობის შესრულებას შემდეგ კვირას შეუდგება მას შემდეგ, რაც იტალიის პარლამენტის ორივე პალატის თანხმობას მოიპოვებს.

„ევრონიუსის“ ინფორმაციით, ნდობის გამოცხადება ფორმალური პროცედურა დარჩა მას შემდეგ, რაც დეპუტატთა უმრავლესობამ განაცხადა, რომ ახალ კანდიდატს მხარს დაუჭერენ. მან მინისტრთა კაბინეტი სხვადასხვა პარტიის წარმომადგენლებით შეავსო. ახალ კაბინეტში ჯუზეპე კონტეს მთავრობაში შემავალმა ზოგიერთმა მინისტრმა თანამდებობა შეინარჩუნა. მაგალითად საგარეო საქმეთა მინისტრად რჩება ლუიჯი დი მაიო.

შეგახსენებთ, იტალიაში სამთავრობო კრიზისი მას შემდეგ დაიწყო, რაც მმართველი კოალიცია მატეო რენცის პარტიამ „იტალია ვივამ" დატოვა, რომელიც მთავრობის კორონავირუსის პანდემიის წინააღმდეგ ბრძოლის სტრატეგიას არ ეთანხმებოდა. 26 იანვარს ჯუზეპე კონტე პრემიერ-მინისტრის თანამდებობიდან იმ იმედით გადადგა, რომ ახალი კოალიციის ფორმირებას მოახერხებდა, თუმცა ვერ შეძლო. ამის შემდეგ იტალიის პრეზიდენტმა, სერჯო მატარელამ ახალი მთავრობის ფორმირება მარიო დრაგის დაავალა.