საქართველოს გაერთიანებული სამეფოს მინისტრი ევროპის სამეზობლოს და ამერიკის საკითხებში, ვენდი მორტონი სტუმრობს.
საელჩოს ინფორმაციით, ეს მინისტრისთვის საქართველოში პირველი ვიზიტია.
როგორც საელჩოში აღნიშნავენ, ვიზიტის ფარგლებში დაგეგმილია შეხვედრები საქართველოს პრემიერ-მინისტრთან, პარლამენტის თავმჯდომარესთან, ვიცე-პრემიერ, საგარეო საქმეთა მინისტრთან და სხვა პოლიტიკურ ლიდერებთან და სამოქალაქო საზოგადოების წარმომადგენლებთან.
„ძალზედ მოხარული ვარ, რომ საქართველოში ვიმყოფები. ეს ჩემი პირველი ვიზიტია და მეძლევა შესაძლებლობა, პირადად გავეცნო გაერთიანებულ სამეფოსა და საქართველოს შორის არსებულ მრავალმხრივ ურთიერთობებს.
ჩვენი ქვეყნები ბევრი მიმართულებით თანამშრომლობენ, მათ შორის, უსაფრთხოების, თავდაცვის, განათლების და პანდემიის შემდგომი მდგრადი განვითარების მიმართულებით, რაც ორივე ქვეყნისთვის ძალზედ სასარგებლოა“, - განაცხადა ვიზიტის დაწყებამდე მორტონმა.
ბრიტანეთში საქართველოს საელჩოს ცნობით, ვიზიტის ფარგლებში, მინისტრი მორტონი ეწვევა კრიზისების მართვის ეროვნულ ცენტრს, რომელიც გაერთიანებული სამეფოს მხარდაჭერით შეიქმნა. მაივე ინფორმაციით, მინისტრი ასევე ეწვევა ადმინისტრაციულ სასაზღვრო ხაზს კონფლიქტით დაზარალებულ რეგიონში და დაესწრება საქართველოს განათლების, მეცნიერების, კულტურის და სპორტის სამინისტროსა და ბრიტანეთის საბჭოს შორის თანამშრომლობის შესახებ მემორანდუმის გაფორმებას.