იაპონიაში დღეიდან კორონავირუსის წინაამდეგ მოსახლეობის ვაქცინაცია დაიწყო.

ვაქცინების გავრცელების უწყების ხელმძღვანელის, ტარო კანოს განცხადებით, დღეიდან Pfizer-BioNTech-ის ვაქცინის გამოყენებით ქვეყნის 100 საავადმყოფოს 40 000-მდე ექიმსა და ექთანს აცრიან.

„ამ 40 000-დან 20 000 ექიმს და ექთანს თავიანთი ჯანმრთელობის მდგომარეობის, ტემპერატურის, თავის ტკივილისა და ნებისმიერი სიმპტომის შესახებ დღიურის წარმოება ვთხოვეთ. ჩვენ მათ 21 დღის განმავლობაში დავაკვირდებით და ისინი ვაქცინის მეორე დოზის მიღებას 10 მარტიდან დაიწყებენ“, – განაცხადა ტარო კანომ.

ვაქცინაციის პირველი ეტაპის შემდეგ, პროცესი 3.7 მილიონი ექიმისთვის, ფარმაცევტისთვის, ექთნისთვის, სასწრაფო სამედიცინო დახმარების მანქანის მძღოლისა და სხვა სამედიცინო მუშაკებისთვის ვაქცინის გაკეთებით გაგრძელდება. ქვეყანაში ხანდაზმულების იმუნიზაციის პროცესი აპრილში დაიწყება.

იაპონიის მთავრობა მთელი მოსახლეობის ვაქცინაციის დასრულებას წლის განმავლობაში გეგმავს.