აზერბაიჯანულმა მხარემ სომხეთს კიდევ 106 დაღუპული სამხედროს ცხედარი გადასცა, - ამის შესახებ ინფორმაციას აზერბაიჯანული მედია ავრცელებს.

მათივე ინფორმაციით, ცხედრების გადაცემის პროცესი რუსი სამშვიდობოების შუამავლობით განხორციელდა.

აზერბაიჯანში აცხადებენ, რომ გათავისუფლებულ ტერიტორიებზე ამ დრომდე 1 379 სომეხი სამხედროს ცხედარია აღმოჩენილი.

შეგახსენებთ, გასული წლის 9 ნოემბერს აზერბაიჯანისა და რუსეთის პრეზიდენტებისა და სომხეთის პრემიერ-მინისტრის მიერ ხელმოწერილი სამმხრივი განცხადება, რომელმაც მთიან ყარაბაღში 27 სექტემბერს დაწყებული საბრძოლო მოქმედებები დაასრულა, სხვა პირობებთან ერთად, სომხურ და აზერბაიჯანულ მხარეებს შორის დაღუპულების ცხედრების გაცვლასაც ითვალისწინებს.