ირანს სურს, 2015 წლის ბირთვული შეთანხმების მონაწილე მხარეებისგან მოქმედება და არა სიტყვები იხილოს, - Reuters-ის ინფორმაციით, ამის შესახებ ირანის უზენაესმა ლიდერმა აიათოლა ალი ხამენეიმ განაცხადა.
„ჩვენ მოვისმინეთ ბევრი ლამაზი სიტყვა და დაპირება, რომლებიც პრაქტიკულად გატეხეს და რომლის საპირისპირო ქმედებები განახორციელეს. სიტყვებსა და დაპირებებს შედეგი არ მოაქვს. ამჯერად, მხარეებისგან მხოლოდ მოქმედების ხილვა გვსურს და ჩვენც ვიმოქმედებთ”, - აღნიშნა ხამენეიმ სატელევიზიო მიმართვის დროს.
აშშ-ის პრეზიდენტმა ჯო ბაიდენმა რამდენიმე დღის წინ განაცხადა, რომ ვაშინგტონი მისი წინამორბედის მიერ 2018 წელს დატოვებულ ბირთვულ შეთანხმებას დაუბრუნდება, თუ თეირანი ხელშეკრულებით აღებულ ვალდებულებებს სრულად შეასრულებს. თავის მხრივ, ირანი აცხადებს, რომ პირველი ნაბიჯი ვაშინგტონმა უნდა გადადგას და ირანს დაწესებული სანქციები გაუუქმოს.