ნინო ჩახნაშვილი არის გამორჩეული საკუთარი მორჩილებით და გააჩნია დიდი გამოცდილება პოლიტიკურად მოტივირებული საქმეების განხილვის. ის იყო მოსამართლე გიორგი რურუას საქმეზე და გამოიყენა პატიმრობა გიორგი რურუას მიმართ, - ამის შესახებ ადვოკატმა დიმიტრი საძაგლიშვილმა „ნაციონალური მოძრაობის” თავმჯდომარე ნიკა მელიას საქმეზე საუბრისას განაცხადა.
მისივე თქმით, დაესწრებიან სასამართლო პროცესს, მიუხედავად იმისა, რომ მათი აქტიურობა და პოზიციების არგუმენტირებულობა მოსამართლეზე არანაირ გავლენას არ მოახდენს.
,,სადაო არ არის ის გარემოება, რომ მოსამართლეთა აბსოლუტური უმრავლესობა არის მორჩილი და ხელისუფლების ნების აღმსრულებელი. ამ აბსოლუტურ უმრავლესობაშიც კი, ნინო ჩახნაშვილი არის გამორჩეული საკუთარი მორჩილებით. მას სამწუხაროდ გააჩნია დიდი გამოცდილება პოლიტიკურად მოტივირებული საქმეების განხილვის. ის იყო მოსამართლე გიორგი რურუას საქმეზე და გამოიყენა პატიმრობა გიორგი რურუას მიმართ. შესაბამისად, დარწმუნებული ვარ, რომ დღეს ნინო ჩახნაშვილის გადაწყვეტილებას არ მოვისმენთ და მოვისმენთ ,,ქართული ოცნების” ხელისუფლების გადაწყვეტილებას, რომელიც იქნება გახმოვანებული მანტიაში ჩაცმული ადამიანის მიერ. ჩვენ, ბუნებრივია, დავესწრებით სასამართლო პროცესს, მიუხედავად იმისა, რომ ჩვენი აქტიურობა და პოზიციების არგუმენტირებულობა არანაირ გავლენას არ მოახდენს მოსამართლეზე, ჩვენ მაინც ყველაფერს გავაკეთებთ. ნიკა მელია იდევნება პოლიტიკური მოტივაციით და ამ შემთხვევაში სიმართლე არის ჩვენს მხარეს”, - აღნიშნა დიმიტრი საძაგლიშვილმა.