რატომ ვერ მოახერხა თქვენმა უწყებამ ტექნიკური მარილი დაეყარა გზებზე, ხომ ვიცოდით წინასწარ, რომ თოვლი მოვიდოდა?! - ზუსტად რომ ეს მიუთითებს თქვენი უწყების და სტრუქტურის არაეფექტურობაზე, - ასე მიმართა „მოქალაქეების“ ლიდერმა ალეკო ელისაშვილმა ვიცე-პრემიერ მაია ცქიტიშვილს პარლამენტის პლენარულ სხდომაზე, სადაც ცქიტიშვილს „მინისტრის საათის“ ფორმატის ფარგლებში უსმენდნენ.
ელისაშვილის თქმით, დღეს, რაც გზებზე ხდება სრული კატასტროფაა.
„ყველამ ვნახეთ დღეს, რაც ხდება გზებზე თბილისშიც და მთელ საქართველოშიც. თბილისის მერის წილ პასუხისმგებლობაზე თქვენ ვერ გკითხავთ, მაგრამ უამრავი მანქანა დაიმტვრა და მოკლედ, არის სრული კატასტროფა. რატომ ვერ მოახერხა თქვენმა უწყებამ ტექნიკური მარილი დაეყარა გზებზე, ხომ ვიცოდით წინასწარ, რომ თოვლი მოვიდოდა?! რატომ მივიდა ამ კატასტროფამდე?! კი ბატონო, რაღაც გამოუსწორებელი მეორედ მოსვლა არ მომხდარა, მაგრამ მე ვფიქრობ, ზუსტად რომ ეს მიუთითებს თქვენი უწყების და სტრუქტურის არაეფექტურობაზე ან არ გაქვთ კომუნიკაცია მეტეოროლოგიურ სამსახურთან“, - განაცხადა ალეკო ელისაშვილმა.