სააკაშვილი თვითონ ვერ ბედავს ჩამოსვლას და სხვებს აქეზებს, რომ არ დაემორჩილონ კანონს და შევიდნენ ციხეში, - ამის შესახებ საპარლამენტო უმრავლესობის წევრმა სოზარ სუბარმა ჟურნალისტებთან განაცხადა.

მისი თქმით, კანონი ყველასთვის კანონია და მას ყველა უნდა დაემორჩილოს.

"ერთადერთი შემიძლია ვურჩიო, მოვუწოდო, რომ ნუ ეშინია. კარგი იქნებოდა, დღესაც მისულიყო სასამართლოში და იქ ემტკიცებინა რამდენად მართებული იყო მის მიმართ რაც პროკურატურამ მოითხოვა. ყველა უნდა დაემორჩილოს კანონს და ეს ზედმეტი კუნთების თამაში, რასაც ზოგიერთი ოპოზიციონერი აკეთებს და განსაკუთრებით ოპოზიციონერი ქვეყნის ფარგლებს გარეთ, რომელიც აქეზებს ადამიანს, თვითონ ვერ ბედავს ჩამოსვლას და სხვებს აქეზებს რომ არ დაემორჩილონ კანონს და შევიდნენ ციხეში, არ არის ეს მისი მხრიდან ღირსეული საქციელი, თუმცა, ღირსეული საქციელი მე არც მახსენდება მაინცდამაინც ბატონი სააკაშვილის მხრიდან", - განაცხადა სოზარ სუბარმა.

მისივე თქმით, თუ სასამართლომ გამოიტანა დაპატიმრების გადაწყვეტილება შსს იმოქმედებს კანონის ფარგლებში.

"ვერც გავრილოვის, ვერც ჟირინოვსკის, ვერც ზიუგანოვის და ვერც ვერავის ზურგს ვერ ამოეფარება ადამიანი, რომელიც სამართალს და კანონს გაურბის. ვერ დაიფარავს იმათი ზურგები, ტყუილად ებღაუჭებიან, ტყუილად უვარდებიან კალთაში, ვერანაირი კასრები და შეშები სამართლის აღსრულების პროცესს ვერ შეაჩერებს", - განაცხადა სუბარმა.