ნათია თურნავა - თუ ყველაფერი კონტროლის ქვეშ იქნება, გამორიცხული არ არის, რომ ახლო მომავალში საკოორდინაციო საბჭოზე  რესტორნების შიდა სივრცეების გახსნაზე მოხდეს მსჯელობა

მორიგი ნაყოფიერი შეხვედრა შედგა სარესტორნო ბიზნესის წარმომადგენლებთან და კიდევ ერთხელ ვიმსჯელეთ, როგორ მოვემზადოთ იმ ეტაპისთვის, როდესაც რესტორნების შიდა სივრცეების ამოქმედებას შევძლებთ, - ამის შესახებ ეკონომიკისა და მდგრადი განვითარების მინისტრმა ნათია თურნავამ რესტორნების წარმომადგენლებთან შეხვედრის დასრულების შემდეგ განაცხადა.

მისი თქმით, იქიდან გამომდინარე, რომ მობილობის თვალსაზრისით, უკვე გახსნილია საკმაოდ ბევრი სფერო, გარკვეული პერიოდია საჭირო იმაზე დასაკვირებლად, თუ როგორ იმოქმედებს ეპიდვითარებაზე სკოლების, ტრანსპორტის, სავაჭრო ინდუსტრიისა და ბაზრობების გახსნა.

ნათია თურნავას განმარტებით, თუ ყველაფერი კონტროლის ქვეშ იქნება და ვითარება ისეთივე პოზიტიური იქნება, როგორც დღეს, არ არის გამორიცხული, რომ ახლო მომავალში საკოორდინაციო საბჭოზე უკვე რესტორნების შიდა სივრცეების გახსნაზე მოხდეს მსჯელობა.

„ამისთვის აუცილებელია, დავინახოთ რა პასუხისმგებლობას იღებს თავის თავზე ეს სფერო. ამიტომ ჩვენ გვესწრებოდა შრომის ინსპექციის თავმჯდომარე, სფეროსთან ერთობლივად გავიარეთ დამატებითი რეგულაციები და ისეთ დეტალებში ჩავედით, როგორიცაა კვადრატულობაზე სტუმრების რაოდენობის გადანაწილება, სავალდებულო ტესტირების წარმოება და სხვა“, - აღნიშნა ნათია თურნავამ.

მინისტრის განცხადებით, განსაკუთრებული მოთხოვნაა და კვლავაც სიმკაცრე იქნება გამოჩენილი ე.წ. სოციალური ღონისძიებების მიმართ, როდესაც საკმაოდ ბევრი ადამიანი იკრიბება რესტორანში, რაც დღეს აკრძალულია.

„კარგად მოგეხსენებათ, რომ შარშან ზაფხულში სწორედ ასეთი ხალხმრავალი ქორწილები, დაბადების დღეები, ნათლობები გახდა ერთ-ერთი მნიშვნელოვანი წინაპირობა ეპიდვითარების გაუარესების. სასიამოვნოა, რომ დავინახეთ მათი მხრიდან სრული მზადყოფნა და საკმაოდ მაღალი პასუხისმგებლობა დავინახეთ. პირიქით, აქეთ მოგვიწოდებდნენ რესტორნები, რომ კონტროლი უფრო მეტად გავამკაცროთ“, - აღნიშნა ეკონომიკისა და მდგრადი განვითარების მინისტრმა.

ამასთან ნათია თურნავამ თხოვნით მიმართა მეიჯარეებს, ნუ შეუქმნიან პრობლემებს იმ რესტორნებს, რომელთაც ფართები აქვთ ნაქირავები.

„ეს ინდუსტრია ძალიან მალე სრულყოფილად ამოქმედდება, ფეხზე დადგება და მათზე უკეთესი დამქირავებლები, მერწმუნეთ, არ გეყოლებათ. აქედან გამომდინარე, ვთხოვ მეიჯარეებს ასევე მოთმინებით მოეკიდონ და ნუ შეუქმნიან პრობლემებს იმ რესტორნებს, რომელთაც ფართები აქვთ ნაქირავები, რადგან დარწმუნებული ვარ, რომ ეს ერთ-ერთი სწრაფად აღდგენადი ბიზნესია“, - განაცხადა სარესტორნო ინდუსტრიასთან შეხვედრის შემდეგ ნათია თურნავამ.

აღნიშნულ ინფორმაციას ეკონომიკისა და მდგრადი განვითარების სამინისტრო ავრცელებს.

კორნელი კაკაჩია - ხელისუფლებამ უნდა შეძლოს ქვეყნის გადაყვანა დაპირისპირების რელსებიდან კონსტრუქციულობის ფორმატში, თუმცა ამის რესურსს მმართველ გუნდში ვერ ვხედავ
დიმიტრი შველიძე - რუსული ოკუპაციის 100 წლისთავზე მთავარია გვახსოვდეს - ყოფილი მეტროპოლია ფარული ჩარევით, მშვიდად უყურებს საქართველოში პოლიტიკური ბანაკების გაუთავებელ ომს
ქართული პრესის მიმოხილვა 25.02.2021
კომპანია "სილქნეტი" განცხადებას ავრცელებს
როგორ შეუძლიათ ბიზნესებს თანამშრომელთა სამუშაო საათები ავტომატურად აღრიცხონ?
ბაკურიანის მსოფლიო თასის ეტაპებისთვის რეგისტრაცია დასრულებულია
ჰააგის სისხლის სამართლის საერთაშორისო სასამართლოსთან არსებულმა დაზარალებულთა ნდობის ფონდმა საქართველოსთვის დახმარების პროგრამა დაამტკიცა
ლაბორატორია „მეგალაბში“ კორონავირუსის ე.წ. ბრიტანული შტამის დადგენაა შესაძლებელი