Facebook- მა ავსტრალიელ მომხმარებლებს საკუთარი პლატფორმა დაუბლოკა, რაც იმას ნიშნავს, რომ ისინი ახალი ამბების შინაარსს ვერ ნახავენ ან გააზიარებენ, - ამის შესახებ ინფორმაციას BBC-ი ავრცელებს.

გამოცემის ცნობით, დღეიდან ავსტრალიელებისთვის ყველა ადგილობრივი და გლობალური ახალი ამბების საიტის ფეისბუქ გვერდები, აგრეთვე მნიშვნელოვანი სამთავრობო საიტები დაიბლოკა.

კომპანია Facebook-მა ეს ნაბიჯი ავსტრალიაში ინიცირებული კანონის საპასუხოდ გადადგა, რომელიც ტექნოლოგიურ გიგანტებს ახალი ამბების შინაარსისთვის გარკვეული საფასურის გადახდის ვალდებულებას აკისრებს.

Facebook- ი და Google-ი ამტკიცებენ, რომ კანონი ინტერნეტის მუშაობასთან შესაბამისობაში არ არის და მათი პლატფორმების უსამართლოდ დაჯარიმებას ითვალისწინებს.

ავსტრალიის ხელისუფლებამ Facebook-ის გადაწყვეტილება გააკრიტიკა.

„Facebook- მა ძალიან ყურადღებით უნდა იფიქროს, თუ რას ნიშნავს ეს მისი რეპუტაციისა და მდგომარეობისთვის,” - განაცხადა კომუნიკაციების მინისტრმა პოლ ფლეტჩერმა.

ავსტრალიის მთავრობაში აცხადებენ, რომ აგრძელებენ კანონის მიღების პროცესს, რომელიც პარლამენტის ქვედა პალატამ ოთხშაბათს დაამტკიცა.

იხილეთ ვიდეო:Facebook-მა ავსტრალიელი მომხმარებლებისთვის საკუთარი პლატფორმა დაბლოკა