სერბეთის მართლმადიდებელ ეკლესიას ახალი მეთაური ჰყავს. 46-ე პატრიარქად მღვდელმთავართა კრებამ ზაგრები-ლუბლიანსკის მიტროპოლიტი პორფირი აირჩია.

პატრიარქის არჩევნების ჩატარება საჭირო გახდა იმის გამო, რომ გასული წლის 20 ნოემბერს სერბეთის ეკლესიის მეთაური ირინეოსი კორონავირუსით გარდაიცვალა.

პატრიარქის არჩევნები ბელგრადში, წმინდა საბა სერბელის სახელობის ტაძარში გაიმართა. უახლოეს პერიოდში პატრიარქის ტახტზე არჩეული მიტროპოლიტის ინტრონიზაცია გაიმართება, რის შემდეგაც ის ოფიციალურად დაიკავებს პირველი მღვდელმთავრის ტახტს.

სერბეთის ეკლესიის ტრადიციის თანახმად, თავდაპირველად ეპისკოპოსები, მთავარეპისკოპოსები და მიტროპოლიტები გამოარჩევენ თავისი რიგებიდან სამ მეტნაკლებად ღირსეულ კანდიდატს. შემდეგ კონვერტში ჩადებული მათი სახელები მოთავსდება სახარებაში, საიდანაც ერთ-ერთ კონვერტს ე.წ. ბრმა წესით ამოარჩევს ერთ-ერთი მონასტრის ყველაზე პატივცემული მონაზონი.