მოსკოვი ესტონელ დიპლომატს აძევებს. რუსეთის საგარეო საქმეთა სამინისტროს ოფიციალური წარმომადგენლის მარია ზახაროვას განცხადებით, გადაწყვეტილება მიღებულია ესტონეთის მიერ რუსი დიპლომატის პერსონა ნონ-გრატად გამოცხადების საპასუხოდ.
„ესტონეთის ახალმა მთავრობამ, შესაძლოა, გადაწყვიტა ამგვარად ეჩვენებინა ლოიალობა თავისი კურატორებისადმი ვაშინგტონსა და ბრიუსელში, რომელმაც სრულიად უსაფუძვლოდ გამოაცხადა პერსონა ნონ-გრატად რუსი დიპლომატი“, - განაცხადა ზახაროვამ.
მისი თქმით, რუსეთის საელჩოს თანამშრომელი კულტურისა და განათლების საკითხებს კურირებდა. ზახაროვას თქმით, ეს ის სფეროებია, რომლებშიც მოსკოვსა და ტალინს შორის თანამშრომლობა ჯერ კიდევ ნარჩუნდება.
რუსეთის საგარეო უწყებაში მოსკოვში ესტონეთის ელჩი უკვე დაიბარეს, რომელსაც გადაწყვეტილების შესახებ ეცნობა.