ესპანეთის ქალაქებში სამეფო გვირგვინის შეურაცხყოფისა და ტერორიზმის ქების ბრალდებით დაპატიმრებული რეპერის მხარდამჭერი აქციები გრძელდება.

წუხელ კატალონიის დედაქალაქ ბარსელონაში ასობით ადამიანი შეიკრიბა, რომლებიც სკანდირებდნენ : „თავისუფლება პაბლო ჰაზელს!“ და „ესპანური მედია, მანიპულატორები!“ მომიტინგეთა ნაწილმა ნაგვის ურნები დაწვა, ბარიკადები აღმართა და სპეცრაზმს ქვები, ბოთლები და სხვა საგნები დაუშინა.

ქალაქ ვალენსიაში პოლიციამ აქციის მონაწილეების დასაშლელად ხელკეტები გამოიყენა და სულ მცირე 8 ადამიანი დააკავა.

აქციების დაწყების დროიდან, საერთო ჯამში, 80-მდე ადამიანია დაკავებული, 100-ზე მეტი პირი კი - დაშავებულია. გავრცელებული ინფორმაციით, კატალონიის რეგიონალურმა პოლიციამ დაიწყო გამოძიება იმის გასარკვევად, მოხვდა თუ არა პოლიციის მიერ ნასროლი ე.წ. „ქაფის ტყვია“ აქციის მონაწილე ერთ-ერთ ახალგაზრდას, რომელმაც თვალი დაკარგა.

32 წლის რეპერი პაბლო ჰაზელი ესპანეთის პოლიციამ ქალაქ ლერიდაში დააკავა. მას სამეფო გვირგვინის შეურაცხყოფისა და ტერორიზმის ქებისთვის ცხრათვიანი პატიმრობა აქვს მისჯილი.