გერმანიაში სკოლის მასწავლებლებსა და საბავშვო ბაღის თანამშრომლებს კორონავირუსის ვაქცინას დაგეგმილზე ადრე შესთავაზებენ
გერმანიაში დაწყებითი სკოლის მასწავლებლებსა და საბავშვო ბაღის თანამშრომლებს კორონავირუსის საწინააღმდეგო ვაქცინაცია, შესაძლოა, დაგეგმილზე ადრე ჩაუტარდეთ, - ამის შესახებ ქვეყნის ჯანდაცვის მინისტრმა, იენს შპანმა განაცხადა.
აღსანიშნავია, რომ გერმანიამ მოსახლეობა სამ ჯგუფად დაყო, იმისთვის, რომ ვაქცინა პირველ რიგში იმ ადამიანებმა მიიღონ, რომლებსაც ყველაზე მეტად სჭირდებათ, მათ შორის 80 წლის და მეტი ასაკის მოქალაქეებმა. ამ ეტაპზე მასწავლებლები და საბავშვო ბაღის თანამშრომლები ბოლო ჯგუფში შედიან.
„ჩვენ გვსურს, ეს ჯგუფი მეორე კლასტერს მალე დავამატოთ და მათ ვაქცინა უფრო ადრე შევთავაზოთ“, – განაცხადა შპანმა.
ცნობისათვის, დღეიდან ქვეყნის 16 ფედერალური რეგიონიდან ათი საბავშვო ბაღებისა და დაწყებითი სკოლების გახსნას აპირებს.
