თურქეთის განცხადებით, საბერძნეთის ოთხმა გამანადგურებელმა თვითმფრინავმა ეგეოსის ზღვაში თურქეთის კუთვნილი ბუნებრივი რესურსების საძიებო გემი Cesme შეავიწროვა.

თურქეთის თავდაცვის სამინისტროს განცხადებით, F-16-ის ტიპის ოთხი რეაქტიული გამანადგურებელი თვითმფრინავი მათ კვლევით ხომალდს მიუახლოვდა და ერთმა მათგანმა ხომალდიდან ორი საზღვაო მილის დაშორებით სასიგნალო რაკეტა ისროლა.

ოფიციალური ათენი ბრალდებებს უარყოფს. საბერძნეთის თავდაცვის სამინისტროში განაცხადეს, რომ მათ თვითმფრინავებს არასდროს შეუვიწროვებიათ თურქული გემი.

თურქეთის მორიგმა კვლევითმა ხომალდმა საქმიანობა ორ ქვეყანას შორის არსებულ საერთაშორისო წყლებში რამდენიმე დღის წინ დაიწყო. თურქეთის საზღვაო ფლოტის მიერ გავრცელებული ინფორმაციით, მათი კვლევითი ხომალდი 18 თებერვლიდან 2 მარტამდე პერიოდში საერთაშორისო წყლების არეალში კვლევას ატარებს. ეს ნაბიჯი საბერძნეთმა გააპროტესტა.