უკრაინაში პრეზიდენტ ვლადიმერ ზელენსკის რეზიდენციასთან გამართულ საპროტესტო აქციაზე მომიტინგეებსა და სამართალდამცავებს შორის მომხდარი შეტაკების შედეგად 27 პოლიციელი დაშავდა, - ამის შესახებ ინფორმაციას მედია კიევის პოლიციის პრესსამსახურზე დაყრდნობით ავრცელებს.

„აქციის დროს მონაწილეებმა “წიწაკის სპრეი” და პიროტექნიკა გამოიყენეს. მათ არ მოახდინეს რეაგირება პოლიციის მოთხოვნაზე, არ ჩაედინათ დანაშაული, რის გამოც სიტყვიერი დაპირისპირება შეტაკებებში გადაიზარდა. ამის შედეგად 27 პოლიციელმა და ეროვნული გვარდიის წევრებმა თვალის დამწვრობა მიიღეს,“- აცხადებენ კიევის პოლიციის პრესსამსახურში.

მათივე ინფორმაციით, სამართალდამცავებმა აქციის 24 მონაწილე დააკავეს, თუმცა, მოგვიანებით, დაკითხვის შემდეგ, ყველა გაათავისუფლეს.

ცნობისათვის, გუშინ "მარჯვენა სექტორის" კიევის განყოფილების ყოფილი ხელმძღვანელის, სერგეი სტერენკოს მხარდამჭერებმა საპროტესტო აქცია გამართეს. ადამიანის გატაცებისთვის მსჯავრდებულ სტერნენკოს ოდესის სასამართლომ შვიდი წლით და სამი თვით თავისუფლების აღკვეთა და ქონების ნახევრის კონფისკაცია შეუფარდა.