აშშ-მა სირიის აღმოსავლეთ ნაწილში, ირანის მიერ მხარდაჭერილი გასამხედროებული ფორმირებების ობიექტების წინააღმდეგ, ავიაიერიში განახორციელა, - ამის შესახებ ინფორმაციას Reuters-ი პენტაგონზე დაყრდნობით ავრცელებს.
სააგენტოს ცნობით, აშშ-მა ეს ნაბიჯი ერაყში ამერიკელი და კოალიციის ჯარისკაცების წინააღმდეგ ბოლო დროს მოწყობილი სარაკეტო თავდასხმების პასუხად გადადგა.
”პრეზიდენტ ჯო ბაიდენის მითითებით, აშშ-ის სამხედრო ძალებმა განახორციელეს საჰაერო თავდასხმები ინფრასტრუქტურის წინააღმდეგ, რომელსაც იყენებენ ირანის მიერ მხარდაჭერილი მებრძოლთა დაჯგუფებები აღმოსავლეთ სირიაში. პრეზიდენტი ბაიდენი იმოქმედებს ამერიკელი და კოალიციის პერსონალის დასაცავად”, - აღნიშნულია პენტაგონის პრესსპიკერის ჯონ კირბის განცხადებაში.
მისივე ინფორმაციით, ავიაიერიშის შედეგად მრავალი ობიექტი განადგურდა, რომელსაც ირანის მიერ მხარდაჭერილი მებრძოლთა ჯგუფები, მათ შორის „კატაიბ ჰეზბოლა“ და „კატაიბ საიდ ალ-შუჰადა“ იყენებდნენ.