ვილნიუსმა მინსკს ბელარუსის პრეზიდენტობის ყოფილი კანდიდატისა და ოპოზიციის ლიდერის სვეტლანა ტიხანოვსკაიას გადაცემაზე უარი განუცხადა.

„ლიეტუვა არ გადასცემს ადამიანებს, რომლებიც პოლიტიკურად იდევნებიან. მინსკში ამის შესახებ მშვენივრად იციან“ , - განაცხადეს ქვეყნის საგარეო საქმეთა სამინისტროს პრესსამსახურში.

დღეს, ბელარუსის საგამოძიებო კომიტეტში განაცხადეს, რომ ტიხანოვსკაიას ექსტრადაციის ინიცირებას ახორციელებენ, რასთან დაკავშირებითაც შესაბამისი დოკუმენტაცია რესპუბლიკის გენერალურ პროკურატურას გადაეცა. ბელარუსმა მიმართა ლიეტუვას, პოლიტიკოსის გადაცემის შესახებ.

ცნობისთვის, 2020 წლის 9 აგვისტოს საპრეზიდენტო არჩევნების შემდეგ, რომლის ოფიციალური შედეგებით მოქმედმა პრეზიდენტმა ალექსანდრ ლუკაშენკომ გაიმარჯვა, საპრეზიდენტო კანდიდატმა სვეტლანა ტიხანოვსკაიამ ლიეტუვას პოლიტიკური თავშესაფარი სთხოვა. მის წინააღმდეგ ბელარუსში სისხლის სამართლის საქმე აღიძრა ექსტრემისტული დაჯგუფების ფორმირებისა და ხელისუფლების მიტაცების მცდელობის მუხლებით.