ინგლისში დღეიდან, იანვრის შემდეგ პირველად, მოსწავლეები სკოლებში ბრუნდებიან. მედიის ინფორმაციით, დღეიდან საკლასო ოთახებს 5-დან-11 წლამდე ასაკის ბავშვები უბრუნდებიან, მომდევნო დღეების განმავლობაში კი ეტაპობრივად მათ 11-დან 18 წლამდე ასაკის მოსწავლეებიც შეუერთდებიან.

საშუალო სკოლის მოსწავლეებს პირველი ორი კვირის განმავლობაში სკოლებში 3 და სახლში ერთი ნებაყოფლობითი კოვიდ 19-ის ტესტის გავლას სთხოვენ. შემდეგ მათ სახლის პირობებში გასაკეთებელი ტესტის კომპლექტს გადაუგზავნიან და ტესტის აღებას კვირაში ორჯერ მოსთხოვენ.

ამასთან, განათლების დეპარტამენტი საშუალო სკოლის მოსწავლეებს პირბადეების ტარებას ურჩევს ყველგან, სადაც სოციალური დისტანციის დაცვა შეუძლებელია, მათ შორის საკლასო ოთახებში. რაც შეეხება დაწყებითი კლასების მოსწავლეებს, მათ არც ტესტირების ჩატარებას და არც პირბადეების გამოყენებას სთხოვენ.

აღსანიშნავია, რომ ინგლისში მოსწავლეები საკლასო ოთახებს საშობაო არდადეგების შემდეგ დაუბრუნდნენ, თუმცა ერთი დღის შემდეგ კვლავ ონლაინ რეჟიმზე გადავიდნენ.