კემბრიჯის ჰერცოგმა სამეფო ოჯახი სასექსის ჰერცოგისა და ჰერცოგინიას მიერ ოპრა უინფრისთან ინტერვიუში რასობრივ თემასთან დაკავშირებით გაჟღერებული ბრალდებებისგან დაიცვა და განაცხადა, რომ ისინი რასისტები არ არიან.
„ჩვენ რასისტული ოჯახი არ ვართ“, - უპასუხა პრინცმა უილიამმა ჟურნალისტის შეკითხვას, არის თუ არა სამეფო ოჯახი რასისტული.
შეგახსენებთ, ტელეკომპანია CBS-მა რამდენიმე დღის წინ პრინც ჰარისა და მისი მეუღლის, მეგან მარკლის ინტერვიუ გაავრცელა, სადაც სასექსის ჰერცოგინია სამეფო ოჯახში არსებულ პრობლემებზე საუბრობს. მისი თქმით, ოჯახის ერთ-ერთი წევრი მათი შვილის, არჩის, დაბადებამდე ღელავდა მისი კანის ფერზე და დასვა კითხვა იმასთან დაკავშირებით, რამდენად მუქი ფერის შეიძლებოდა ყოფილიყო მისი კანი, თუმცა მეგანმა სამეფო ოჯახის აღნიშნული წევრის ვინაობა არ დააკონკრეტა.
ინტერვიუსთან დაკავშირებით განცხადება გაავრცელა ბუკინგემის სასახლემ, სადაც აღნიშნულია, რომ მეგან მარკლის მიერ ინტერვიუში რასობრივ თემასთან დაკავშირებით წამოჭრილი საკითხები მათთვის შემაშფოთებელია.
„მთელი ოჯახი დამწუხრებულია იმის გაგებით, რამდენად რთული იყო ჰარისა და მეგანისთვის ბოლო წლები. წამოჭრილი საკითხები, კერძოდ კი რასიზმთან დაკავშირებული საკითხი, შემაშფოთებელია. ჩვენ ეს საკითხები სერიოზულად მივიღეთ და მიუხედავად იმისა, რომ მოგონებები შესაძლოა განსხვავებული იყოს, ოჯახი პირადად განიხილავს მათ. ჰარი, მეგანი და არჩი ყოველთვის იქნებიან ოჯახის საყვარელი წევრები“, – აღნიშნულია სამეფო სახლის მიერ გავრცელებულ განცხადებაში.