ავსტრიის კანცლერი, სებასტიან კურცი აცხადებს, რომ COVID-19-ის საწინააღმდეგო ვაქცინის დოზები თანაბრად არ ნაწილდება ევროკავშირში წევრი ქვეყნების მოსახლეობის მიხედვით, როგორც ეს შეთანხმებული იყო ბლოკის შიგნით.

კურცის თქმით, მიუხედავად იმისა, რომ ევროკავშირის ლიდერები მოსახლეობის შესაბამისად ვაქცინის განაწილების პრინციპზე შეთანხმდნენ, ვაქცინაციის საკითხებში ევროკავშირის მესვეურებმა ისეთი შეთანხმებები გააფორმეს ფარმაცევტულ კომპანიებთან, რომლებიც ამ პრინციპის საწინააღმდეგოა.

„მიწოდება არ არის დაფუძნებული წევრი ქვეყნების მოსახლეობის პრინციპზე. როგორც ჩანს, არსებობს გეგმები, რომ ეს პრაქტიკა კიდევ უფრო გაძლიერდება უახლოეს თვეებში და სხვაობა წევრ სახელმწიფოებს შორის უფრო და უფრო გაიზრდება. ნიდერლანდები ივნისის ბოლომდე მოსახლეობის რიცხვის მხრივ არა მხოლოდ მის მეზობელ ქვეყნებზე მეტ დოზებს მიიღებს, არამედ თითქმის ორჯერ მეტსაც, ვიდრე - ხორვატია“, - აღნიშნა კანცლერმა პრესკონფერენციაზე.

აქვე მან გამჭვირვალობისა და გამოსავლის მოძიებისკენ მოწოდებები გააჟღერა.