ხაზარაძე-ჯაფარიძე-წერეთლის საქმის ადვოკატი ზვიად კორძაძე „ტვ პირველთან“ დაკავშირებით სასამართლოს განჩინებას სოციალურ ქსელ „ფეისბუქში“ ეხმიანება და ხაზარაძე-ჯაფარიძის საქმესთან პარალელს ავლებს.

"დაზარალებული თუ არაა დანაშაული არ არისო, კონვერტი იქნება თუ წერილი, თუნდაც ფოსტით არ იყოს გამოგზავნილი, გამოძიებისთვის საყურადღებოაო.

მეტს კი არაფერს ვამბობდით ხაზარაძე-ჯაფარიძის საქმეზე", - წერს კორძაძე.

ცნობისთვის, საქართველოს გენერალურმა პროკურატურამ გავრცელებულ ფარულ ჩანაწერებთან დაკავშირებით გამოძიება დაიწყო. უწყების ინფორმაციით, სისხლის სამართლის საქმე კერძო საუბრის უნებართვო ჩაწერის ან/და მიყურადების, ასევე კერძო კომუნიკაციის ჩანაწერის, ტექნიკური საშუალებით მოპოვებული ინფორმაციის უკანონოდ გამოყენებისა და გავრცელების ფაქტებზე აღიძრა.

როგორც გუშინ გახდა ცნობილი, სასამართლომ პროკურატურას „ტვ პირველიდან“ იმ ფარული აუდიოჩანაწერების ამოღების უფლება მისცა, სადაც სავარაუდოდ, პრემიერ-მინისტრ ირაკლი ღარიბაშვილის, სახელმწიფო დაცვის სპეციალური სამსახურის უფროსის ანზორ ჩუბინიძისა და ბერა ივანიშვილის საუბარია ჩაწერილი. დღეს კი "ტვ პირველმა” თბილისის საქალაქო სასამართლოს განჩინება გაასაჩივრა.