მიანმარში საპროტესტო აქციების კიდევ ორი მონაწილე დაიღუპა,- ამის შესახებ ინფორმაციას Reuters-ი ადგილობრივ მედიაზე დაყრდნობით ავრცელებს.
მათივე ინფორმაციით, აქციის მონაწილეები ქალაქ იანგონში პოლიციის შენობასთან იყვნენ შეკრებილები და დაკავებული მომიტინგეების გათავისუფლებას ითხოვდნენ, რა დროსაც პოლიციამ მათი მიმართულებით ცეცხლი გახსნა.
შეერთებული შტატების, ინდოეთის, ავსტრალიისა და იაპონიის ლიდერებმა გუშინ განაცხადეს, რომ მიანმარში დემოკრატიის აღდგენის მიზნით ერთად იმუშავებენ.
„როგორც მიანმარისა და მისი ხალხის დიდი ხნის მხარდამჭერები, ხაზს ვუსვამთ დემოკრატიის აღდგენის გადაუდებელ აუცილებლობას,“- ნათქვამია ოთხი ქვეყნის ლიდერების ერთობლივ განცხადებაში.
გავრცელებული ინფორმაციით, მიანმარში, 1-ელი თებერვლის სამხედრო გადატრიალების შემდეგ მიმდინარე საპროტესტო აქციებისას, 70-ზე მეტი მომიტინგე დაღუპა. ამასთან, აღნიშნული პერიოდის განმავლობაში უსაფრთხოების ძალებმა 2 000-ზე მეტი ადამიანი დააკავეს.