გაერთიანებული ერების ორგანიზაციის გენერალური მდივნის წარმომადგენლის, სტეფან დუჯარიკის განცხადებით, მიანმარში აქციების დროს დაღუპულთა რიცხვი 138-მდე გაიზარდა. მისი თქმით, მხოლოდ გასული კვირის განმავლობაში მიანმარში პოლიციის მხრიდან ძალადობას სულ მცირე 56 ადამიანი ემსხვერპლა. გენერალური მდივნის წარმომადგენლის განცხადებით, დაღუპულებს შორის ქალები და ბავშვებიც არიან.
მიანმარში საპროტესტო აქციები თებერვლის დასაწყისში მომხდარი სამხედრო გადატრიალების შემდეგ არ წყდება. არმიამ, რომელიც გასული წლის ნოემბერში ჩატარებული არჩევნების შედეგებს არ აღიარებს, ქვეყნის არჩეული ლიდერი აუ სან სუ ჩი დააკავა და ერთწლიანი საგანგებო მდგომარეობა გამოაცხადა. აქციების დროს 2000-ზე მეტი ადამიანი დააკავეს.