მიხეილ სარჯველაძის განმარტებით, ამჟამად დღის წესრიგში იუსტიციის მინისტრის გოჩა ლორთქიფანიძის თანამდებობის დატოვების აუცილებლობა არ დგას
საპარლამენტო უმრავლესობის წარმომადგენლის მიხეილ სარჯველაძის ინფორმაციით, ამ დროის მდგომარეობით, დღის წესრიგში იუსტიციის მინისტრის გოჩა ლორთქიფანიძის თანამდებობის დატოვების აუცილებლობა არ დგას.
"ამჟამად გოჩა ლორთქიფანიძე იუსტიციის მინისტრის პოსტზე იმყოფება და ის ამ თანამდებობაზე მუშაობას აგრძელებს. რამდენადაც მაქვს ინფორმაცია, ამ წუთას მას დღის წესრიგში თანამდებობის დატოვების აუცილებლობა არ უდგას. როდესაც ეს მოცემულობა შეიცვლება, პრემიერ-მინისტრის დისკრეციაა აღნიშნულ თანამდებობაზე კონკრეტული კანდიდატურა შეარჩიოს. ის თუ ვინ განიხილება ან განიხილება თუ არა ვინმე, ჩემთვის ცნობილი არ არის", - განუცხადა ჟურნალისტებს მიხეილ სარჯველაძემ.
იუსტიციის მინისტრმა გოჩა ლორთქიფანიძემ ჰააგის სისხლის სამართლის საერთაშორისო სასამართლოში მოსამართლის ფიცი უკვე დადო. ლორთქიფანიძე ერთ-ერთია სასამართლოში ახლად არჩეულ ექვს მოსამართლეს შორის.
v-if="article.gallery" v-html="article.gallery"
