ბრისტოლში სამართალდამცავებსა და დემონსტრანტებს შორის მომხდარი დაპირისპირების შედეგად ორი პოლიციელი დაშავდა
ინგლისის ქალაქ ბრისტოლში, სადაც ახალი კანონპროექტი გააპროტესტეს, რომელიც პოლიციას საპროტესტო აქციების შეზღუდვებისთვის დამატებით ძალაუფლებას ანიჭებს, სამართალდამცავებსა და დემონსტრანტებს შორის დაპირისპირება მოხდა.
Reuters-ის ინფორმაციით, ძალადობაში გადაზრდილ საპროტესტო აქციაზე ორი სამართალდამცავი მძიმედ დაშავდა. დამწვარია პოლიციის ორი ავტომობილი.
დემონსტრანტების ნაწილმა სამართალდამცავებს პიროტექნიკა დაუშინა, პოლიციის ავტომობილებს ცეცხლი წაუკიდა და პოლიციის შენობის კედლები დააზიანა.
მომხდარს ქვეყნის შინაგან საქმეთა მინისტრი პრიტი პატელი გამოეხმაურა და აღნიშნა, რომ ბრისტოლში მომხდარი ფაქტები მიუღებელია.
„კრიმინალურ ძალადობასა და უწესრიგობას არ შევეგუებით,“- აღნიშნა მინისტრმა.
ბრისტოლის ადგილობრივი სამართალდამცავების განცხადებით, უახლოეს მომავალში ყველა დამნაშავის იდენტიფიცირება მოხდება და ისინი კანონის წინაშე პასუხს აგებენ.
