რუსეთის პრეზიდენტი ვლადიმერ პუტინი 23 მარტს კორონავირუსის საწინააღმდეგო ვაქცინაციას ჩაიტარებს. ამის შესახებ მან ვაქცინის წარმოების გაზრდისა და მოსახლეობის ვაქცინაციის მიმდინარეობის საკითხებზე გამართული ონლაინ შეხვედრისას განაცხადა.
მან ხაზი გაუსვა, რომ ვაქცინაცია არის თითოეული ადამიანის პირადი და ნებაყოფლობითი გადაწყვეტილება.
"ვაქცინაცია, რა თქმა უნდა, თითოეული ადამიანის ნებაყოფლობითი არჩევანია, თითოეული ადამიანის პირადი გადაწყვეტილებაა. სხვათა შორის, ამას ხვალ გავაკეთებ. ჩვენ მიზანს აუცილებლად უნდა მივაღწიოთ, იმის უზრუნველსაყოფად, რომ ჩვენ გვქონდეს კოლექტიური იმუნიტეტი. სიტუაციის სრულად დასტაბილურებისთვის, ქვეყნის ზრდასრული მოსახლეობის არანაკლებ 60 პროცენტი უნდა იყოს აცრილი“, - აღნიშნა პუტინმა.
მისმა პრესმდივანმა დიმიტრი პესკოვმა არ დააზუსტა, სამიდან რომელი რუსული ვაქცინით აიცრება პუტინი, თუმცა დაადასტურა, რომ ეს ეროვნული წარმოების ვაქცინა იქნება.
თავის მხრივ, რუსეთის ლიდერმა აღნიშნა, რომ ექვს მილიონზე მეტმა ადამიანმა უკვე მიიღო რუსული ვაქცინის ერთი კომპონენტი მაინც. პუტინი ირწმუნება, რომ რუსული ვაქცინები აბსოლუტურად საიმედო და უსაფრთხოა. პრეზიდენტმა ასევე აღნიშნა, რომ უცხოური პრეპარატები არ აჩვენებენ დაცვის ასეთ მაღალ ხარისხს.
”ეს ჩვენი ადგილობრივი მეცნიერების და სპეციალისტების უპირობო წარმატებაა. ის ასევე აღიარებულია საზღვარგარეთ”, - თქვა პუტინმა.