ტედროს ადანომ გებრეისუსი აშშ-ში ჩატარებულ კვლევაზე - ეს მონაცემები კიდევ ერთხელ ადასტურებს, რომ „ასტრაზენეკას“ ვაქცინა უსაფრთხო და ეფექტურია
„ასტრაზენეკას“ მაგალითს კოვიდ-19-ის საწინააღმდეგო ვაქცინების სხვა მწარმოებლებმაც უნდა მიბაძონ და ლიცენზია გასცენ, რომ მათი ტექნოლოგია სხვებმაც გამოიყენონ, – ამის შესახებ ჯანდაცვის მსოფლიო ორგანიზაციის დირექტორმა, ტედროს ადანომ გებრეისუსმა განაცხადა და დასძინა, რომ ეს ნაბიჯი ვაქცინების წარმოების ზრდას შეუწყობს ხელს.
ჯანდაცვის მსოფლიო ორგანიზაციის ხელმძღვანელმა კიდევ ერთხელ გაუსვა ხაზი, რომ ვაქცინების არათანაბარი განაწილება პანდემიის წინააღმდეგ ბრძოლაზე უარყოფითად მოქმედებს.
„განსხვავება მდიდარი ქვეყნების მიერ მიღებული ვაქცინების რაოდენობასა და „კოვაქსის“ საშუალებით მიღებულ რაოდენობას შორის იზრდება და ყოველდღე უფრო გროტესკული ხდება. ვაქცინების არათანაბარი განაწილება არა მხოლოდ მორალურად აღმაშფოთებელია, ის ასევე ეკონომიკური და ეპიდემიოლოგიური თვალსაზრისით თვით-დამარცხების გამომწვევია,“- აღნიშნა ჯანმო-ს ხელმძღვანელმა.
ტედროს ადანომ გებრეისუსი ასევე გამოეხმაურა აშშ-ში „ასტრაზენეკას“ ვაქცინაზე ჩატარებული კვლევის შედეგებს, რომლის თანახმადაც ვაქცინა 79%-ით ეფექტურია და ამასთან, თრომბის წარმოქმნის რისკს არ ზრდის.
„ეს მონაცემები კიდევ ერთხელ ადასტურებს, რომ „ასტრაზენეკას“ ვაქცინა უსაფრთხო და ეფექტურია,“- აღნიშნა ჯანმო-ს ხელმძღვანელმა.
