ევროკავშირთან ურთიერთობების მთელი ინფრასტრუქტურა განადგურებულია ბრიუსელის მიერ გადადგმული ცალმხრივი ნაბიჯებით, ამიტომ მოსკოვს ამ ორგანიზაციასთან ურთიერთობა აღარ აქვს, - ამის შესახებ რუსეთის საგარეო საქმეთა მინისტრმა სერგეი ლავროვმა ჩინელ კოლეგა ვან ისთან ერთობლივ პრესკონფერენციაზე განაცხადა.

„ევროკავშირთან, როგორც ორგანიზაციასთან, არანაირი ურთიერთობები არ არსებობს. ამ ურთიერთობების მთელი ინფრასტრუქტურა განადგურებულია ბრიუსელის მიერ მიღებული ცალმხრივი გადაწყვეტილებებით”, - აღნიშნა ლავროვმა.

მისი თქმით, რუსეთი ევროკავშირთან თანამშრომლობის გასაზრდელად საჭირო კონტაქტებისთვის მზად მაშინ იქნება, როდესაც ბრიუსელი ორმხრივ ურთიერთობებში ანომალიების აღმოფხვრას აუცილებლობად ჩათვლის.

„როდესაც ევროპელები ჩათვლიან, რომ საჭიროა მათ უდიდეს მეზობელთან ურთიერთობებში ანომალიების აღმოფხვრა, რა თქმა უნდა, ჩვენ მზად ვიქნებით, გავზარდოთ თანასწორობასა და ინტერესთა ბალანსზე დაფუძნებული ურთიერთობები,“- აღნიშნა რუსეთის საგარეო უწყების ხელმძღვანელმა.